Dísella Lárusdóttir þreytti frumraun sína hjá Metropolitan óperunni í New York í mars 2013 þar sem hún söng hlutverk Garsendu í óperunni Francesca da Rimini eftir ítalska tónskáldið Riccardo Zandonai. Síðan þá hefur hún fengið að spreyta sig í sjö öðrum óperuuppfærslum á þessu merka sviði; sem Woglinde í óperum Richards Wagner, Rheingold og Götterdämmerung, þjón í Frau Ohne Schatten eftir Richard Strauss, fyrsta skógarálf í Rusalka eftir Antonin Dvorák og Lísu í La Sonnambula eftir Vincenzo Bellini, Barenu í óperunni Jenufa eftir Leoš Janáček og síðast en ekki síst hlutverk Papagenu í Töfraflautunni eftir W.A. Mozart.
Þess má geta að Francesca da Rimini og Rusalka voru sýndar í beinni útsendingu um allan heim í svokallaðri HD Live sýningu.
Vorið 2013 kom Dísella fram sem einsöngvari í Vesperae Solennes de Confessore eftir Mozart í Carnegie Hall og sumarið 2014 söng hún Stabat Mater eftir Giovanni Battista Pergolesi í Disney Hall í Los Angeles. Þá kom hún fram á tónlistarhátíðum í Madison, Wisconsin og í Breckenridge, Colorado.
Dísella mun stíga á svið Metropolitan óperunnar aftur í janúar og febrúar nk., í hlutverkum Gianettu úr L’elisir d’Amore e. G. Donizetti og sem “Flower maiden” í Parsifal e. R. Wagner.
Dísella þreytti einnig nýverið frumraun sína á sviði í Evrópu (utan Íslands) þegar hún fór með hlutverk Lulu í samnefndri óperu eftir Alban Berg í óperunni í Róm á Ítalíu.