Atte Kilpeläinen stundaði nám við Tónlistarháskólann í Köln og við Síbelíusar-akademíuna í Helsinki. Síðan 2005 hefur hann gegnt stöðu leiðara lágfiðludeildar Fílharmóníunnar í Helsinki. Sem gestaleiðari hefur hann komið fram með hljómsveitum á borð við Chamber Orchestra of Europe, Sænsku útvarpshljómsveitina og Gewandhaus í Leipzig.

Árið 2006 gekk Atte til liðs við finnska strengjakvartettinn Meta4 sem heldur reglulega tónleika um Evrópu og víðar. Kvartettinn hefur gefið út upptökur af verkum, m.a. eftir Sibelius, Haydn, Shostakovich og Bartók, sem hafa hlotið lof gagnrýnenda og ýmis verðlaun. Atte hefur verið kennari við Síbelíusar-akademíuna síðan 2012 en hefur jafnframt leitt masterklassa við Kuhmo-tónlistarhátíðina.