Hjartanlega velkomin á Reykholtshátíð!
Hátíðin í ár státar af fernum stórglæsilegum tónleikum með mörgum af okkar fremstu listamönnum sem og erlendum gestum. Sérstakur gestur hátíðarinnar er finnski strengjakvartettinn Meta4 sem hefur getið sér gott orð víða um heim með leik sínum sem og hljóðupptökum. Einnig er sérstök ánægja að bjóða velkominn kammerkórinn Schola Cantorum undir stjórn Harðar Áskelssonar, en kórinn hlaut Íslensku tónlistarverðlaunin sem Tónlistarflytjandi ársins 2016. Að venju mun fyrirlestur á vegum Snorrastofu og hátíðarmessa á sunnudeginum einnig setja svip sinn á hátíðarhelgina.
Á opnunartónleikum Reykholtshátíðar verða flutt verk eftir Johann Sebastian Bach og Arvo Pärt. Þó að 250 ár aðskilji tónskáldin þá eiga þau fleira sameiginlegt en í fyrstu mætti halda. Báðir hafa þeir haft áhrif langt út fyrir heim klassískrar tónlistar og hjá báðum njóta kórverk þeirra sérstöðu. Það er því mikið tilhlökkunarefni að fá að heyra Schola Cantorum flytja nokkur af öndvegisverkum þessara tveggja meistara. Jafnframt munu hljóðfæraleikarar Reykholtshátíðar flytja hinn sprellfjöruga Brandenburgar-konsert nr. 3 eftir Bach.
Á kammertónleikunum á laugardeginum kl. 16 verður finnski strengjakvartettinn Meta4 í aðalhlutverki. Á efnisskrá tónleikanna kallast á hið gamla og nýja. Við fáum að heyra Beethoven-strengjakvartett úr op. 18 setti meistarans og nýlegt verk eftir finnska tónskáldið Juha Koskinen, eitt áhugaverðasta tónskáld sinnar kynslóðar. Í lok tónleikanna mun hljóma Mozart-strengjakvintett í c-moll og bætist Þórunn Ósk Marinósdóttir lágfiðluleikari þá í hópinn.
Það er löng hefð fyrir því á Reykholtshátíð að halda söngtónleika þar sem einsöngsrödd og píanó fá að njóta sín til fullnustu. Í ár eru það tónlistarkonurnar Dísella Lárusdóttir sópran og píanóleikarinn Nína Margrét Grímsdóttir sem munu gleðja áheyrendur á laugardagskvöldinu en þær eru báðar meðal okkar þekktustu tónlistarmanna. Efnisskrá tónleikanna leiðir okkur í víðfemt ferðalag um Evrópu á seinni hluta nítjándu aldar og fyrri hluta þeirrar tuttugustu með verkum eftir Debussy, Strauss, Rachmaninoff og de Falla.
Á lokatónleikum Reykholtshátíðar bætist Berglind Stefánsdóttir flautuleikari í hópinn og við fáum að heyra flautukvartett eftir Mozart. Á tónleikunum mun einnig hljóma sjaldheyrt verk fyrir fiðlu og selló eftir belgíska sellósnillinginn og tónskáldið Adrien-François Servais. Að lokum verður flutt eitt dáðasta kammerverk allra tíma, Strengjaoktett í Es-dúr op. 20 eftir Mendelssohn – verk sem er uppfullt af andagift og æskufjöri og hljómar nú í fyrsta sinn á Reykholtshátíð.
Kæru hátíðargestir, það er af nógu að taka þessa þrjá daga sem hátíðin stendur yfir. Hlustum, njótum og upplifum saman!
Sigurgeir Agnarsson,
listrænn stjórnandi Reykholtshátíðar
