Kammerkórinn Schola Cantorum hefur verið mikilvirkur flytjandi tónlistar undir stjórn Harðar Áskelssonar í 21 ár. Kórinn hefur á þessum árum komið víða við á víðfeðmum akri tónlistarinnar en líklega verið hvað atkvæðamestur í flutningi tónlistar frá 20. og 21. öld og þar hefur frumflutningur íslenskra tónverka jafnan vegið þungt. Kórinn hefur jafnhliða sinnt gamalli fjölröddun endurreisnartímans sem hentar tærum hljómi kórsins vel líkt og mikið af þeirri kórtónlist sem samin er á okkar dögum. Samvinna Schola cantorum og Alþjóðlegu barokksveitarinnar í Hallgrímskirkju hefur verið mikilvæg í starfsemi kórsins og saman hafa þau flutt undir stjórn Harðar Áskelssonar verk á borð við Jólaóratóríuna eftir J.S. Bach, óratóríuna Ísrael í Egyptalandi eftir G.F. Händel og Requiem eftir André Campra.

Kórinn hefur einnig unnið með fjölmörgum öðrum listamönnum við tónleikahald, upptökur fyrir geislaplötur, sjónvarp og kvikmyndir og þar má nefna Björk, Sigur Rós, Wildbirds and Peacedrums, Hjaltalín, Tim Hecker, Ben Frost, Jóhann Jóhannsson og Kjartan Sveinsson.
Schola cantorum hefur haldið tónleika víða um heim, nú síðast í Los Angeles í apríl sl., þar sem kórinn söng á fjórum konsertum á Reykjavík Festival í Walt Disney Concert Hall, en hátíðin var skipulögð af LA Philharmonic Orchestra. Þar voru jafnframt frumflutt þrjú verk eftir Huga Guðmundsson, Hreiðar Inga Þorsteinsson og Gunnar Andreas Kristinsson sem öll fjalla um vináttuna eins og hún er útlö
gð í Hávamálum. Einnig söng kórinn alla efnisskrá Meditiatio á tónleikum í First Congregational Church í borginni. Geislaplatan Meditatio kom út á vegum sænsku útgáfunnar BIS snemmsumars 2016 og hefur hlotið afar lofsamlega umfjöllun víða um heim í tónlistartímaritum og tónlistarnetmiðlum.
Fyrr á þessu ári var Schola cantorum útnefndur Tónlistarflytjandi ársins í flokki sígildrar- og samtímatónlistar á Íslensku tónlistarverðlaununum 2017.