Elmar Gilbertsson útskrifaðist frá Söngskóla Sigurðar Demetz vorið 2007 og lagði síðar stund á nám við Tónlistarháskólann í Amsterdam og Konunglega tónlistarháskólann í Den Haag. Elmar hefur starfað mikið við óperuhúsið í Maastricht ásamt lausráðningum við óperuhús víðsvegar um Evrópu.

Elmar hefur sungið og túlkað allnokkrar af persónum óperubókmenntanna. Má þar nefna Tamino í Töfraflautunni, Don Ottavio í Don Giovanni, Ferrando í Cosí fan tutte, Alfred í Leðurblökunni, Elvino í La Sonnambula, Nerone í Krýningu Poppeu, Kúdrjás í Katja Kabanova , Mími í Rínargullinu og hlutverk Hertogans af Mantua í Rigoletto.

Elmar hlaut Grímuverðlaunin 2014 sem söngvari ársins og einnig Íslensku tónlistarverðlaunin sama ár sem söngvari ársins í flokki sígildrar- og samtímatónlistar.