Þóra Einarsdóttir stundaði söngnám við Söngskólann í Reykjavík hjá Ólöfu Kolbrúnu Harðardóttur og við Guildhall School of Music and Drama hjá Prof. Lauru Sarti. Þóra þreytti frumraun sína að námi loknu við Glyndebourne Festival Opera árið 1995. Hún steig þó fyrst á svið Íslensku óperunnar aðeins 18 ára gömul í litlum hlutverkum í Rigoletto og í Töfraflautunni.

Auk Íslensku óperunnar hefur Þóra sungið hlutverk í ENO, Opera North, Opera Factory London, Wiesbaden, Mannheim, Nürnberg, Berlín, Basel, Salzburg, Prag, Bologna, Malmö og Lausanne. Meðal helstu hlutverka eru Pamina í Töfraflautunni, Susanna í Brúðkauði Figaros, Ilia í Idomeneo, Despina í Cosi fan tutte, Zerlina í Don Giovanni, Cleoparta í Júlíusi Sesar, Euridice í Orfeo ed Euridice, Nanetta í Falstaff, Marie í Dóttir herdeildarinnar, Musetta í La Boheme Sophie í Rosenkavalier, Adele í Leðurblökunni, Gretel í Hänsel und Gretel, Ännchen í Freischütz, Woglinde og Waldvogel í Niflungahringnum. Hér heima er skemmst að minnast frammistöðu hennar í hlutverkum Mimiar í La Boheme, Pamínu í Töfraflautunni og Gildu í Rigoletto sem hún hlaut einróma lof gagnrýnenda fyrir. Auk fjölda tónleika á Íslandi hefur hún komið fram á tónleikum víða bæði í Evrópu og Bandaríkjunum m.a í Barbican Hall, Royal Albert Hall og Royal Festival Hall í London, Konzerthaus Berlin, Berliner Dome, Die Philharmonie am Gasteig í München, Kennidy Center í Washington og Weil Recital Hall í New York. Danadrottning sæmdi hana Dannebrogorðunni árið 1997 og hún hlaut hina íslensku fálkaorðu árið 2011. Þóra söng hlutverk Mimi í fyrstu heildarútgáfu á óperunni Vert-Vert eftir Offenbach sem nýverið kom út hjá Opera Rara í London. Þóra söng hlutverk Önnu Frank í óperunni Dagbók Önnu Frank eftir Grigori Frid í Íslensku óperunni á Listahátíð 2008 og í óperu Sunleif Rasmussen Í óðsmannsgarði á listahátíð 2009.