Helga Þóra Björgvinsdóttir, fiðluleikari, fæddist árið 1984. Hún stundaði nám við Tónmenntaskóla Reykjavíkur hjá Gígju Jóhannsdóttur og síðar við Tónlistarskólann í Reykjavík hjá Guðnýju Guðmundsdóttur og Auði Hafsteinsdóttur. Vorið 2004 útskrifaðist hún með Bachelor-gráðu frá Listaháskóla Íslands þar sem aðalkennari hennar var Guðný  Guðmundsdóttir. Haustið 2004 hóf Helga Þóra nám við Listaháskólann í Berlín  (Universität der Künste Berlin) hjá Isabelle Faust og lærði kammertónlist hjá Artemis kvartettinum. Í júlí 2007 þreytti Helga Þóra Diplom-próf og hlaut hæstu einkunn. Sem einleikari hefur Helga Þóra leikið fiðlukonserta eftir Brahms, Mendelssohn og fiðlukonsert nr. 2 eftir Bohuslav Martinu með Sinfóníuhljómsveit Íslands og tvær rhapsódíur fyrir fiðlu og hljómsveit eftir Béla Bartók með Sinfóníuhljómsveit Unga fólksins. Hún tók þátt í tónleikaröðinni Tónsnillingar morgundagsins í apríl 2008 og hélt þar sína Debut tónleika með Kristni Erni Kristinssyni, píanóleikara.  Helga Þóra hefur verið meðlimur Kammersveitarinnar Ísafoldar frá upphafi og er meðlimur Elektra Ensemble sem var valinn Tónlistarhópur Reykjavíkurborgar árið 2009. Hún hefur m.a. leikið með Sinfóníuhljómsveit Íslands, Kammersveit Reykjavíkur, Orkester Norden, Orchestre Prométhée, Orchestre de la Cité Internationale Universitaire de Paris og Sebestyen strings. Helga Þóra hefur sótt námskeið til Ítalíu, Frakklands og Þýskalands og  hefur numið fiðluleik hjá m.a. Donald Weilerstein, Boris Garlitsky, Laurent Korcia, Stephen Clapp, Almitu Vamos, Suzanne Gessner og Svetlin Roussev. Um þessar mundir er Helga Þóra búsett í Belgíu þar sem hún stundar Masters-nám við Konunglega tónlistarháskólann í Brussel hjá Kati Sebestyen.