Réka Szilvay er ein af virtustu fiðluleikurum Finnlands. Hún hóf feril sinn eftir glæsilega frumraun hjá Musikverein í Wien og síðan hefur hún komið fram um gjörvalla Evrópu, Kína, Japan, Taiwan, Suður-Ameríku og í Bandaríkjunum.
Réka er fædd í Helsinki, inn í tónelska ungversk-austurríska fjölskyldu. Réka hóf að leika á fiðlu um fjögurra ára aldur undir handleiðslu föður síns Gésa Szilvay, sem er höfundur Colourstrings fiðlukennsluaðferðarinnar. Hún hóf snemma að leika opinberlega. Hún kom oftar en 50 sinnum fram í finnska sjónvarpinu í barnæsku og lék í fyrsta sinn með finnsku útvarpshljómsveitinni á 11. aldursári sínu. Tólf ára hóf hún nám við Sibeliusarakademiuna, undir handleiðslu Tuomas Haapanen. Frá 1992 til 1998 nam hún við Tónlistarháskólann í Vínarborg, hjá Gerhard Schulz (í Alban Berg kvartettinum). Hún hefur tekið þátt í ýmsum námskeiðum m.a. hjá Max Rostal, Sándor Végh, Ana Chumachenko og György Kurtág.
Réka hefur komið fram sem einleikari með frægum hljómsveitum á borð við London Philharmonic, Sinfóníuhljómsveitinni í Dallas, Sinfóníuhljómsveit Gautaborgar, Mozarteum hljómsveitinni í Salzburg, Haydn fílharmoníunni í Austurríki og Fílharmoníunni í Strassborg og fjölda annarra. Hún hefur jafnframt leikið í flestum af þekktustu tónleikahöllum heims.
Réka Szilvay hefur verið einleikari og leikið á tónleikaferðalögum með öllum helstu hljómsveitum Finnlands. Hún hefur jafnframt leikið undir stjórn hljómsveitastjóra á borð við Valery Gergiev, Jukka-Pekka Saraste, Neeme Järvi, Sakari Oramo, Osmo Vänskä, Leif Segerstam, Hubert Soudant, János Fürst, og Juha Kangas svo einhverjir séu nefndir.
Réka Szilvay kemur reglulega fram sem einleikari og kammertónlistarmaður á alþjóðlegum tónlistarhátíðum. Má þar nefna Klangbogen Wien, Singapore Arts Festival, Festival Grafenegg, Kuhmo kammertónlistarhátíðina, Helsinki tónlistarhátíðina, David Oistrach Festival, Haydn Festspiele Eisenstadt, auk fjölda annarra.
Leik Réku hefur fjölmörgum sinnum verið útvarpað beint, frá tónleikum jafnt í Finnlandi sem og utan Finnlands.
Debut-geisladiskur Réku “The 7 Seasons” (Warner records) hlaut frábærar viðtökur og dóma, sem og geisladiskur hennar “The Roaring Twenties” (Alba records) sem fékk einróma lof í alþjóðlegum tímaritum.
Árið 2006 var Réka Szilvay ráðin sem prófessor við Sibeliusar akademiuna í Helsinki. Hún hefur margoft haldið meistaranámskeið og tekur virkan þátt í mikilvægri umræðu um ergonomy í fiðluleik.
