Jósef Ognibene hefur verið leiðandi hornleikari Sinfóníuhljómsveitar Íslands frá árinu 1981. Hann er stofnfélagi í Blásarakvintetti Reykjavíkur og leikur einnig reglulega með Kammersveit Reykjavíkur og hljómsveit Íslensku óperunnar. Hann fæddist í Bandaríkjunum og hóf tónlistarnám í Los Angeles hjá Ralph Pyle og Vincent de Rosa. Hann stundaði síðan framhaldsnám hjá Hermann Baumann í Þýskalandi og hlaut þriðju verðlaun í keppninni Vorið í Prag árið 1978.

Jósef kemur oft fram í heimalandi sínu og hefur m.a. tekið þátt í tónlistarhátíðum í Colorado og Alaska, auk þess sem hann lék nýlega með Pacific-kammerhljómsveitinni í Los Angeles. Þá hefur hann leikið með London Mozart Players, Sinfóníuhljómsveit San Francisco, Sinfóníuhljómsveitinni í Singapúr, Útvarpshljómsveitinni í Frankfurt og BRThljómsveitinni í Brüssel.

Jósef hefur kennt við Tónlistarskólann í Reykjavík í nærri þrjá áratugi og eru flestir meðlimir horndeildar Sinfóníuhljómsveitar Íslands fyrrum nemendur hans. Hann er listrænn stjórnandi Hornleikarafélags Íslands og var meðal helstu skipuleggjenda Norræna hornaþingsins hér á landi árið 2008. Hann hefur flutt og hljóðritað allmörg verk fyrir horn og hljómsveit með SÍ, kennir og leikur við ýmis tækifæri víða um heim, og er meðlimur í ráðgjafarnefnd Alþjóðlega hornleikarafélagsins, International Horn Society.