Vovka Ashkenazy fæddist í Moskvu en ólst upp að mestu á Íslandi og Englandi. Hann hóf píanónám hjá Rögnvaldi Sigurjónssyni sex ára gamall og tíu árum síðar hélt hann til Englands þar sem hann nam hjá Sulamita Aronovsky við Royal Northern College of Music í Manchester. Þá sótti hann einnig tíma hja Peter Frankl og Leon Fleisher.
Vovka debuteraði í Lundúnum í Barbican Centre árið 1983 með Lundúnarsinfóníunni, þar sem hann lék 1. píanókonsert Tjaíkovskís. Síðan þá hefur hann leikið um allan heim. Hann hefur komið fram á Marlboro hátíðinni í Vermont sem og Edinborgar og Spoleto tónlistarhátíðunum. Hann hefur leikið einleik með flestum stærstu sinfóníuhljómsveitum Bretlands, Fílharmóníuhljómsveitinni í Los Angeles, sinfóníuhljómsveitum í Berlín og fjölmörgum öðrum. Stjórnendur sem hann hefur unnið með eru m.a. faðir hans; Vladimir Ashkenazy, Seymon Bychkov, Martin Fischer-Dieskau og Stanislaw Skrowaczewski í tónleikahöllum svo sem Óperuhúsinu í Sydney, Berlínarfílharmoníunni og Royal Festival Hall í London.
Vovka er afar virkur sem kammertónlistarmaður. Hann hefur hljóðritað fjölda geisladiska m.a. með föður sínum og bróður, Dimitri. Með föður sínum hljóðritaði hann m.a. Sónötu fyrir tvö píanó og slagverk eftir Bartók, Svítu fyrir fjórhent á píanó eftir Rachmaninoff, Andante og tilbrigði fyrir tvö píanó, tvö selló og horn eftir Schumann, og árið 2009 kom út diskur með samleik þeirra, með franskri tónlist fyrir tvö píanó, öll verkin gefin út af DECCA hljómplötufyrirtækinu. Þá kom út diskur í september árið 2011 með Rússneskum fantasíum fyrir tvö píanó í flutningi þeirra feðga. Ferðuðust þeir víða með þessa efnisskrá; til Ítalíu, Sviss og Tyrklands, ásamt Japan og Suður-Kóreu. Með bróður sínum Dimitri, hefur hann hljóðritað geisladisk með ítalskri tónlist fyrir klarinett og píanó.
Samhliða tónleikahaldi er Vovka ötull kennari og leiðbeinandi á meistaranámskeiðum. Um þessar mundir er hann kennari (Master of Advanced Studies) við Conservatorio della Svizzera í Lugano og einnig við alþjóðlegu píanóakademíuna í Imola.
Vovka er ásamt fjölskyldu búsettur í Sviss.
