Donald Kaasch er fæddur í Bandaríkjunum og er virtur og eftirsóttur óperusöngvari víða um heim. Hann er íslenskum tónleikagestum að góðu kunnur því hann söng hlutverk Fausts í Fordæmingu Fausts eftir Berlioz í eftirminnilegum flutningi Sinfóníuhljómsveitar Íslands fyrir nokkrum árum þegar hann kom fram ásamt góðum vini sínum Kristni Sigmundssyni sem söng hlutverk Mephisto. Donald hefur sungið við öll helstu óperuhús heims þ.á.m. á La Scala, við Metropolitan óperuna, í Bastillu-óperunni í París, Covent Garden í London og víðar. Hann hefur einnig sungið með mörgum virtustu hljómsveitum heims og unnið með stjórnendum á borð við Claudio Abbado, James Levine, Simon Rattle o.fl. Donald kom nýlega fram ásamt Fílharmóníuhljómsveit Lundúna á Edinborgarhátíðinni þar sem hann söng Te Deum eftir Berlioz. Hann söng einnig nýverið einsöngshlutverkið í Carmina Burana á Ravinia hátíðinni í Bandaríkjunum og hlutverk Siegmunds i fyrsta sinn í konsertuppfærslu í Kína. Donald Kaasch er nú gestur Reykholtshátíðar í annað sinn en hann hélt eftirminnilega tónleika á hátíðinni 2005.